Contábavos o oitro día falando das Sardiñas de San Xoan que oitro dos meus pratos preferidos (os que me coñezades preguntarédesvos cal será o prato que non estea entre os meus preferidos…) era a empanada de xoubas de pan de millo. Hoxe falaremos da de croques coa mesma masa de pan de millo, oitra obra de arte da nosa cociña tradicional.
A receita desta empanada facíaa xa igual miña avoa, agora faina miña nai e eu intento, repito, intento facela tamén, ainda que ei de recoñecer que é un dos pratos que se me resiste. E é que despois de vela facer varias ducias de veces, tomar mil anotacións e ter toda unha galería fotografica do asunto, sempre hai algo que fai que non saiba igual, que se o forno non é o mesmo, que se as fariñas en Vigo non son como as que se mercan no mercado dos sábados en Ribeira, que se a auga, que se os croques, … A verdade é que polo menos no meu caso hai algo de sentimental tamén no asunto que fai que certos pratos da cociña da túa casa de toda a vida saiban alí como en ningunha oitra parte, pásame tamén co galo da casa que soemos tomar por noiteboa, cas laconadas, as filloas e as orellas no entroido, e agora no vran ata co churrasco que preparamos no galpón.
En realidade e aínda que falemos de empanada de millo, nos sempre utilizamos unha mezcla de fariña milla e triga, para que quede un pouco mais suave e non se note tanto ese punto amargo que lle confire a fariña de millo. Hai tamén quen lle engade ademáis un pouco de fariña de centeo, que ao ser mais escura dalle unha cor moi bonita á empanada. Aquí tendes a nosa receita para quen se atreva a probala:
Medidas para dúas empanadas: Quentar 1 litro de auga cunhas areas de sal e engadir 20 gr de levadura de panadería desleida nun vaso de auga. Nun bol votar 500 gr de fariña de millo, engadir o auga quente co sal e a levadura e remover ata que quede unha masa espesa. Deixala enfriar. Cando estea fría engadir oitros 500 gr de fariña de trigo e remover todo ben. Engadir agora 2 ovos batidos con 3 culleradas soperas de azucre. Deixar reposar tapada cun pano.
Para o rustrido quentar nunha tixola ½ litro de aceite de oliva e pochar 4 cebolas, medio pemento vermello e medio pemento verde, 2 dentes de allo e un tomate maduro. Cando as verduras estean ben pochadas engadir 1,2 kg de berberechos xa cocidos e sin cuncha (podense deixar alguns na súa cuncha para decorar), deixar cocer un rato e apagar o lume. Cando xa non estea quente engadir unha cullerada sopera de pimentón doce e sal se fixera falla.
Cubrir a base da empanadeira con aceite. Sen estirar a masa ir votandoa cunha culler e estendendendoa o mellor posible na empanadeira de modo que quede unha capa o máis fina posible pero sin deixar ningún oco. Votar o rustrido uniformemente por toda a empanada e cubrir co resto da masa, procurando de novo que quede o máis fina posible. Esta masa non ten a elasticidade da de trigo e haberá que ir cubrindo aos poucos e tapando os ocos que vaian quedando.
De ahí ao forno ben quente a 200 ºC durante 45 minutos ou ata que consigas unha cor ben dourada por riba.
A ver si tendes maís sorte ca min e vos sae á primeira.
